“Azərenerji” ASC-də “kütləvi ixtisarlar” olubmu? "Mühafizəçilərin bir qismi ixtisar edilsə də..."

“Azərenerji” ASC-də “kütləvi ixtisarlar” olubmu?

Son günlər bəzi internet xəbər saytlarında "Azərenerji” ASC-də kütləvi ixtisarların aparılması, həmin ixtisarların  qanunsuz olması ilə bağlı məlumatlar dərc olunmaqdadır.  Bəs əslində nə baş verib?

"Azərenerji” ASC-nin ictimaiyyətlə əlaqələr və mətbuat mərkəzinin rəhbəri Teymur Abdullayev virtualaz.org-a açıqlamasında deyib ki, əslində heç bir kütləvi ixtisarlardan söhbət getmir.  Məsələ bundan ibarətdir ki, ötən ilin iyul ayında Mingəçevir şəhərində yerləşən "Azərbaycan” İstilik Elektrik Stansiyasında baş verən qəzadan sonra yaradılan Dövlət Komissiyasının yekun rəyinə əsasən bu müəssisədəki mühafizə postlarından 3-ü ləğv edilib. Və həmin əraziyə nəzarəti həyata keçirmək mühafizə polisinə həvalə edilib.

"Eyni zamanda hazırda stansiyada perimetr boyu ağıllı kamera və hasarlama işinə başlanılıb. "Mingəçevir” Su Elektrik Stansiyasının 2 hissəsini və  Mingəçevir Su Anbarını, o cümlədən "Varvara” Su Elektrik Stansiyasını Fövqəladə Hallar Nazirliyi qoruduğu üçün daxildə eyni işi görən mühafizə dəstəsini ən azı ixtisar etməyə ehtiyac vardı. Bütün bunlara görə də, Əmək Məcəlləsinin tələblərinə uyğun olaraq mühafizəçi ştatının bir qismi ixtisar edilib. Eyni zamanda ixtisara düşən mühafizəçilərə stansiyalarda müvafiq işlər təklif edilib və onların əksəriyyəti bununla razılaşıblar”-Teymur Abdullayev bildirib.

Onun sözlərinə görə, ötən ilin iyulunda baş verən hadisələrdən əvvəl stansiyaların ərazisini mühafizəçilər müşahidə edirdi. İndi isə bütün hər yerdə olduğu kimi, "Azərenerji” ASC-də də ağıllı kamera sistemi qurulur. "Azərbaycan” İES başda olmaqla elektrik stansiyaları strateji obyektlərdir və onların mühafizəsi olduqca mühüm məsələdir. Bu səbəbdən də müasir texnologiyalar əsasında mühafizə və müşahidə sistemini təşkil etmək, mühafizə dəstələrini optimallaşdırıb daha çevik formaya gətirmək günün tələbidir.

T.Abdullayev qeyd edib ki, "Azərenerji” ASC-nin mərkəzi aparatında təmir işlərinin aparılması ilə bağlı mətbuatda yayılan məlumatlar da həqiqətdən uzaqdır. Çünki  təmir mərkəzi aparatda deyil, Azərbaycan Elmi-Tədqiqat və Layihə-Axtarış Energetika İnstitutunda aparılır.

"Sovet dövründə tikilən və yararsız hala düşən bu binada nəinki elmi fəaliyyət, heç normal iş şəraiti mövcud deyil. Bu səbəbdən də institutda təmir işlərinə başlanılıb və yaxın zamanlarda həmin bina müasir standartlara uyğun səviyyəyə gətiriləcək”-”Azərenerji” ASC-nin rəsmisi bildirib.


Загрузка...

Xəbər lenti